Украин президенти Владимир Зеленский АКШнын чабарманы Стив Уиткофф жана Трамптын күйөө баласы Жаред Кушнер менен телефон аркылуу “так жана конструктивдүү” маектешкенин билдирди. Америкалык эки өкүл 2-декабрда Орусия лидери Владимир Путин менен жолугуп, АКШнын тынчтык планын талкуулашкан.
“Биз көптөгөн аспектилерге көңүл буруп, кан төгүүнү токтотууга кепилдик бере турган жана Орусиянын үчүнчү жолу басып кирүү жана өз убадаларын аткарбай коюу коркунучун жоюуга жардам бере турган маанилүү нерселерди ыкчам талкууладык”, - деди Зеленский.
Сүйлөшүүгө учурда АКШда жүргөн Украинанын Улуттук коопсуздук жана коргоо кеңешинин катчысы Рустем Умеров жана Башкы штабдын башчысы Андрей Гнатов да катышты.
Axios басылмасы булактарына таянып жазгандай, сүйлөшүү эки саатка созулуп, анда тараптар аймактык маселелерди жана коопсуздук кепилдигин сүйлөшкөн. Басылманын маектешинин айтымында, аймактык маселелер тууралуу талкуу “татаал” болгон. Орусия буга чейинкидей эле өзүнүн көзөмөлүндө болгон Донбасс аймагынан Украинанын күчтөрүн чыгарып кетүүнү талап кылууда, бирок АКШ “бул көйгөйдү чечүүгө жаңы сунуш ойлоп табууга аракет кылып жатат”.
Коопсуздук кепилдиги боюнча маселеде тараптар кыйла алдыга жылып, макулдашууга жакындаганын басылманын маектеши билдирген.
Ал ошондой эле Уиткофф менен Кушнер эки тарапка тиешелүү маалыматтарды чогултуп, макулдашууну шарттай турган талаптарга макул кылдыруу үчүн Путинге да, Зеленскийге да басым көрсөткөнүн айтып берген.
АКШ президентинин Украина боюнча атайын өкүлү Кит Келлог ишембиде Украинадагы согушту токтотуу боюнча макулдашууга “аз калганын” жана чечим Донбасстын жана Запорожье атомдук электр станциясынын келечеги тууралуу маселеден көз каранды экенин айткан.
Владимир Путин 2-декабрда Москвада АКШнын президенти Дональд Трамптын атайын чабарманы Стив Уиткофф жана күйөө баласы Жаред Кушнер баштаган америкалык делегация менен жолуккан. Жергиликтүү басылмалар Орусиянын Украинага каршы согушун токтотуу тууралуу сүйлөшүүлөр дээрлик беш саатка созулганын, Уиткофф жолугушуудан кийин АКШнын Москвадагы элчилигине жөнөп кеткенин жазышкан.
7-декабрга караган түнү Орусия Украинага 241 дрон жана беш баллистикалык ракета менен сокку урганын украин Куралдуу күчтөрү билдирди.
Маалыматка караганда, анын ичинен 175 дрон, төрт ракета жок кылынды.
"14 локацияга 65 дрон тийгени катталды", – деп жазылган маалыматта.
Бутага Полтава облусундагы Кременчуг шаары да алынып, инфратүзүмдүк жайларга зыян келтирилгенин калаанын мэри Виталий Малецкий билдирди.
Курмандыктар жана жараат алгандар тууралуу маалымат жок. Шаардын көптөгөн райондорунда суу, жарык, жылуулук берүү үзгүлтүккө учураганы белгилүү болду.
Кийинчерээк облус башчысы Владимир Когут Кременчуг районунда энергетикалык бир нече ишканага сокку урулганын маалымдады.
Чернигов облусунун Новгород-Северский шаарында Орусиянын дрон чабуулунан бир киши каза тапты. Калаада бир нече жерде өрт тутанды.
Согуш шартында тараптардын маалыматтарын ыкчам текшерүү мүмкүн эмес.
Орусиянын агрессиясына жооп иретинде Украина орус армиясын камсыздаган ишканаларды бутага алып келет. Ишемби түнү украин дрондору Рязандагы мунайды кайра иштетүүчү заводго сокку урганы кабарланган. Шаар жана облус тургундары бул түнү жарылуунун добушун угушканын айтып беришти. Рязан облусунун губернатору соккунун айынан өрт чыкканын, жабырлануучулар жок экенин билдирди.
Рязан заводу жылына 17 миллион тоннадан көп мунайды иштетет. Бул жайда бензин, дизел жана реактивдүү май чыгарылат. Мындан тышкары завод жылына 840 миң тоннадай авиациялык керосин чыгарат жана орус армиясынын аба-космостук күчтөрүн камсыздайт.
ASTRA Телеграм каналы билдиргендей, Рязан заводуна 2025-жылдан бери ушуну менен тогузунчу ирет сокку урулду.
Орусиянын Коргоо министрлиги бул түнү 116 украиналык дрон жок кылынганын же колго түшүрүлгөнүн билдирди. Анын көбү Рязан облусунун аймагында. Мындан тышкары 20дан ашык дрон Воронеж, Брянск жана Белгород облустарынын аймагында катталган.
Воронеж облусунун губернатору Александр Гусев Телеграмга “бир катар муниципалдык мекемелер зыян тартканын” билдирди.
ASTRA жазган маалыматка караганда, кеминде бир украиналык дрон Волгоград облусундагы “Альфаойл” мунай базасына да сокку урган.
Орусиянын Краснодар аймагында дрон чабуулунан Темрюк порту жабыркады. Бул тууралуу жергиликтүү оперативдик штаб билдирди.
Маалыматка караганда, порт аймагында өрт чыккан. Окуя болгон жерде атайын жана куткаруу кызматтары иштеп жатат. Бийлик чабуул үчүн украин армиясын күнөөлөдү.
Орусиянын Коргоо министрлиги аймак үстүнөн бир дрон атып түшүрүлгөнүн маалымдады.
ASTRA Телеграм каналы күбөлөрдүн видеолорун талдап, портто күйүп жаткан объект газ терминалы болушу мүмкүн деген тыянакка келди.
Ал арада Орусияга караштуу Чеченстан жумуриятынын борбору Грозный шаарындагы “Грозный-Сити” көп кабаттуу комплекстеринин бирине дрон менен сокку жасалганы кабарланды. Ал имарат Чеченстандын башчысы Рамзан Кадыровдун резиденциясынан 800 метр аралыкта, Федералдык коопсуздук кызматынын (ФСБ) аймактык башкармалыгына да жакын жайгашкан. Бул тууралуу бир катар орусиялык жана украиналык Телеграм каналдар жазышты.
Расмий бийлик бул чабуулду ырастай элек. Таңга жуук Росавиация Грозный аэропортундагы учуп-конууларга чектөө киргизген.
ASTRAнын маалыматы боюнча, Сызрань шаарында (Самара облусу) дрондор жергиликтүү мунай иштетүүчү заводду да аткылаган. Сызрандын мэри Сергей Володченков дрон чабуулун ырастады, анын кесепеттери тууралуу маалымат берген жок. Орусиянын Коргоо министрлиги Самара облусунун үстүнөн тогуз дрон атып түшүрүлгөнүн билдирди.
Орус армиясы 2022-жылдын февралында Украинага согуш ачканы дээрлик күн сайын абадан чабуул коюп келет. Көптөгөн видео жана фото далилдерге карабастан Москва жарандык жайларга сокку урганын четке кагып, бир гана аскердик объектилерди бутага алганын айтып жүрөт. Ал эми украин күчтөрү орус армиясына колдоо көрсөткөн Орусиядагы мунай базаларын бутага алып келет.